小女子台語歌入門

本文以質樸流暢的漢羅台文撰寫。

文／數念入夢ê台語歌
編輯、圖／小女子
攝影／數念入夢ê台語歌、小女子

感謝小女子ê邀請，tsâng暝去看tī 高雄流行音樂中心辦ê「真愛秀・藍寶石大歌廳」，原本我無抱啥物期待，感覺可能只是teh用藍寶石歌廳ê名義做一場普通ê演唱會niâ😅

想袂到節目ê安排逐項攏有，現場大樂隊、大phâng ê舞蹈團、換幾若su衫ê主持人、練痟話練kah講一堆黃色ê、捒道具出來搬ê歌中劇、甚至閣有王彩樺現場褪衫換衫……真正心適！

我本身足無愛去人濟ê所在，所以印象中應該是毋捌看過台語歌手ê現場（除了tī音樂祭看過伍佰），tsa̋ng雖然現場一樓ê椅仔足細條，坐kah真袂四序，但是第一擺看著足濟「偶像」出現tī面頭前，實在有夠感動。

親像曾心梅teh唱〈思念你的心肝你敢知〉ê時，叫逐家開手機仔ê手電綴leh搖，彼一幕我目屎真正擋袂牢lìn落來，較早毋知偌濟家己一ê人ê時陣，偷偷仔放這條歌出來聽，毋知寄付偌濟心事tī這條歌內底。
如今曾心梅本人頭鬃已經鉸短，徛tī台仔頂唱出來，原仔hiah-nī溫柔、hiah-nī悲傷，tī台跤ê我親像若眠夢，茫茫到深更。

黃妃mā是我頭一擺看著本人，雖然前一站仔確診予伊有淡薄仔受著影響，但是唱歌ê聲音原仔是hiah-nī妖嬌可愛，而且hông訪問ê時陣，彼ê腔口完全就是阮正港ê高雄人，毋nā親切mā感覺足驕傲。

另外一ê高雄人蔡小虎，閣是真正tui藍寶石大歌廳開始發展ê，如今經過hiah濟年，演唱ê組曲已經是台灣人逐ê攏teh唱ê經典，聽了真正夭壽感動。
龍千玉ê服裝有夠大範，除了唱〈錯愛〉、〈風中的玫瑰〉……等等，mā有kah蔡小虎合唱〈蝴蝶夢〉。
in兩人彼ê對唱ê畫面，正正就是彼ê年代牽手一世人ê台灣人翁仔某，現場看著mā是目屎強欲流落來，數念ê夢境就按呢tī目睭前搬出來，實在足感謝遮ê tī台語歌壇拍拚ê人。

其他閣有聽王彩樺講伊tī高雄kah藍寶石ê往事、 蔡昌憲現場深情ê歌聲、 張秀卿一開始唱ê〈車站〉kah〈辣妹駕到〉、kah伊hām 邵大倫足自然足趣味ê主持，攏hông印象足深，是一ê足精彩ê表演。

另外，我原本對林慧萍完全無熟，干焦聽過伊是玉女歌手，無想到講玉女ê台語氣口有夠好，訪問ê時陣閣講著「供體(king-thé)」這ê詞，誠感動neh。

轉來厝lìn揣lueh才知影原來伊捌hām黃乙玲合作過，〈講乎自己聽〉就是林慧萍作曲、in兩ê做伙合唱ê，林慧萍ê演唱會mā招黃乙玲做伙合唱〈癡情月娘島〉，兩人唱了開講mā是足濟足深ê台語neh！

主辦單位足用心，做一支影片teh紀念tī藍寶石拍拚過ê人，毋nā豬哥亮，閣有足濟樂師、舞者、甚至門口拭皮鞋ê人攏有tī內底，規場煞了後我閣tī hia看彼塊影片看足久。
影片內底ê配樂，是豬哥亮ê〈好裡家在〉，是伊在生最後一張專輯〈你永遠是我的最愛〉ê最後一條歌，武雄ê詞陳玉立ê曲，就是teh講舞台頂ê人ê心聲，幹，主辦單位哪會遮gâu揀？

辦這場活動實在足無簡單，比我原本想ê加好毋知幾萬倍，所有ê細節攏予人足感動足感動，真希望以後閣有機會閣再看一擺！

編後記：真的很感謝粉專歌友張滬雲的熱心贈票，給更多喜愛台語歌的年輕歌迷一個不錯過現場的契機。如藍寶石大歌廳的大場面，在台語歌壇已愈來愈珍稀，期待下次盛會有更多人共襄盛舉，同齊欣賞典型台語歌之美。
更鼓勵參與盛會的歌迷寫下自己聽歌的感受，給台語歌壇更多正能量，小女子台語歌入門長期徵稿👍